Primeira fichaxe do Pontevedra CF SAD para a tempada 2022-2023: Ángel Bastos defenderá a camiseta granate durante dúas tempadas.
A fichaxe anunciouse despois de confirmar desde as oficinas de Pasarón a Antonio Fernández como novo adestrador. O defensa de Mos vén do Raio Majadahonda despois de ascender hai dúas tempadas co equipo madrileño a Primeira RFEF. O defensa, que pode xogar nos dous laterais e tamén de central, xogou a tempada pasada 25 partidos de titular, tendo tamén protagonismo no play off de ascenso a segunda división que finalmente non conseguiron ao perder nos últimos minutos na semifinal contra o Albacete.
O defensa de 30 anos comezou a súa carreira profesional no Coruxo, para despois pasar por equipos como o Reus, o Estremadura ou a Cultural Leonesa, coa que conseguiu un ascenso. No Raio Majadahonda xogou 2096 minutos de titular, sendo un xogador imprescindible para os da meseta.
